അഗ്നിമുദ്രകൾ

അഗ്നിമുദ്രകൾ

__________________

(രചന:Rema Prasanna Pisharody, Bangalore

Phone: 9611101411)

_______________________

ഇരുപുഴകൾ കൈവഴികളില്ലാത്തവർ

ഒഴുകിയെന്നേ കടലിൽ മറഞ്ഞവർ

പുതിയ സന്ധ്യയെ കണ്ടത്ഭുതത്തിന്റെ

മഴകളായി  പുനർജന്മമേറ്റിയോർ

എഴുതുവാൻ ചിലമ്പേറ്റി വനത്തിലെ

കഠിനകാലങ്ങൾ ദുർഗയെതേടിയോർ

തപസ്സിലായവർ, വീണ്ടും ജപകാല

പുലരിയിൽ പുതുവേഷം ധരിച്ചവർ

അരണിയിൽ നിന്നു സൂര്യനെ തേടിയോർ

അനുസ്വരങ്ങളിൽ ആത്മാവ്തേടിയോർ

പഴയ ഭിത്തിയിൽ മായാതെ നിൽക്കുന്ന

വിടവ്കണ്ട്  വിതുമ്പിക്കരഞ്ഞവർ

ചിതകൾ കത്തിയെരിയുമിടങ്ങളിൽ

കുളിരുമായി ജലം തൂവി നിന്നവർ

അവരെവിടെയന്നാത്മാഹുതിചെയ്ത-

നദികളെല്ലാമെവിടെ?, മറഞ്ഞുവോ!

മഴയുടെയുത്ഭവം പർവ്വതങ്ങളിൽ-

ഇടറിവീഴുന്ന ശ്യാമമേഘങ്ങളിൽ;

ചിതറിവീണർദ്ധരാവിലെ സ്വാതന്ത്ര്യ-

മൊരു പകുത്തരക്തപ്പുഴയ്ക്കുള്ളിലായ്

നെടുകെ കീറിയ ഭാരതഭൂപടം

പലയിടങ്ങളുടഞ്ഞു കരയവെ

മഷിപുരണ്ട മിഴികൾ വിതുമ്പവെ

വിഷമിരുണ്ട നീർച്ചോല മരിക്കവെ

പകലിരവുകൾ, സംവൽസരങ്ങളിൽ

പതിയെ നീങ്ങിയ നൂറ്റാണ്ടുകൾക്കുള്ളിൽ

കടലുകൾസാക്ഷി, കല്പകാലത്തിന്റെ

സ്മൃതികൾ സാക്ഷി ഇതാണിന്ന് ഭാരതം..

വരികളിൽ വർണ്ണമേകുവാനാകാത്ത

നിഴലറുതി, നിലയ്ക്കാത്ത താണ്ഡവം

അതിരിലെന്നുമൊടുങ്ങാത്ത ഗന്ധക-

പ്പുകയൊഴുകുന്ന താഴ്വാരമുണ്ടതിൽ

നദികളുണ്ടതിൽ, നഷ്ടങ്ങളുണ്ടതിൽ

വഴിപിരിഞ്ഞൊരു നോവുകളുണ്ടതിൽ

നിറയെമഞ്ഞുമായ് ഹിമശൃംഗമുണ്ടതിൽ

പലവിധമുള്ള ഭാഷകളുണ്ടതിൽ

അധികമെങ്കിലും സ്വപ്നങ്ങൾ നെയ്യുന്ന

പഴയകാലത്തിൻ നൂൽചക്രമുണ്ടതിൽ.

പുതിയസൂര്യന്റെ അഗ്നിയിൽ നീറ്റിയ

പുലരിയുണ്ട്, ത്രിവർണ്ണവുമുണ്ടതിൽ.

എഴുതിയാലും നിറയാത്ത സംസ്കൃതി

ഇത് സ്വതന്ത്രമാമിന്ത്യതൻ മൺതരി

അവിടെയുണ്ടെന്റെ പൂർവ്വികർ, രണ-

ഭൂവിലടർനയിച്ച സുധീര മനസ്സുകൾ,

ജനിമൃതികൾ പരിത്യാഗമാം ഹോമ-

ഹവനകുണ്ഡത്തിലാഹൂതി ചെയ്തവർ

അവരെയോർക്കുന്നു ഞാനിപതാകയെ

ഹൃദയമേറ്റിയുയർത്തട്ടെ ജീവനായ്

ഇത് സ്വതന്ത്രമാം രാവിന്റെയോർമ്മകൾ

എഴുതിയാലും മതിവരാത്തോർമ്മകൾ,

സ്മൃതിയിത് ജന്മജന്മാന്തരങ്ങളിൽ

എഴുതിസൂക്ഷിച്ചു വയ്ക്കേണ്ട മുദ്രകൾ