കിളിയോട്

*കിളിയോട്*

..........................

രചന:അച്ചു കിഴക്കേപാലയ്ക്കൽ

...............................................

കുഞ്ഞു പൈങ്കിളീ നിന്നെത്തൊടാനെനി-

ക്കെത്ര മോഹമായെൻ കരം നീട്ടി ഞാൻ

എത്ര ഞാനടുത്തെത്തിയെന്നാകിലും

അത്ര ദൂരേക്കകലുന്നതെന്തു നീ?

നിന്റെ ലോലമാം കുഞ്ഞു കപോലങ്ങൾ 

നോക്കി നില്ക്കുവാനെന്തെന്തു ചാരുത !

നിന്റെ കുഞ്ഞിളം ചുണ്ടിൽ നിന്നോമനേ...

പുഞ്ചിരിപ്പാലമൃതു ചൊരിയുമോ?

ഒന്നടുക്കുവാൻ ഒന്നു തലോടുവാൻ

ഒന്നുമിണ്ടുവാൻ പോലുമരുതെങ്കിൽ...

എന്തിനിങ്ങനെയീ ജാലകത്തിലൂ-

ടെന്നെ നോക്കിയിരിക്കുന്നു നീ വൃഥാ?

എന്റെ പൈങ്കിളീ ഒന്നിങ്ങണയുമോ?

എന്നരികത്തു തെല്ലൊന്നിരിക്കുമോ?

മധുരമാം നിന്റെ നാദത്തിൽ നിന്നൊരു

നല്ല താരാട്ടുപാടിയുറക്കുമോ?

                *അച്ചു കിഴക്കേപാലയ്ക്കൽ*