മോചനം

മോചനം

.............................

രചന:സതീഷ്‌ ഇടപ്പോണ്‍

...........................

“എനിക്കച്ഛനുമമ്മയും വേണം”

ഇടനെഞ്ചുപൊട്ടിപ്പിടയുന്നു പിഞ്ചുഹൃദയം

കോടതിവരാന്തയില്‍

കുടിലതന്ത്രം മെനയുന്നു

വെറുപ്പിന്‍റെ വിഷവീര്യം-

കുടിച്ചുന്മത്തരാം നിന്നച്ഛനുമമ്മയും.

വെറുമൊരു വാക്കിന്‍റെ-

നോക്കിന്‍റെ നോവിനാല്‍

കരള്‍മുറുക്കി കച്ചകെട്ടി നില്‍പ്പവര്‍

വിഫലബീജാങ്കുരംപോല്‍ നീ

വിഹായസ്സിലൊറ്റയ്ക്കുപാറുന്ന പക്ഷിപോല്‍ നീ.

അരുതാത്തതൊന്നുമേ പറയാതെ-

യരികിലിരിക്കേണ്ടോര്‍ 

പകയുടെ വിഴുപ്പുകള്‍

പരസ്പരം പകുത്തിറങ്ങുന്നു

പുതിയ പരിണയകഥ മെനയുന്നു.

പിരിയുന്നു നിന്നച്ഛനുമമ്മയും.

അനാഥമീ ജന്മശിഷ്ടവഴികള്‍

അന്യനായത് അച്ഛനോ, അമ്മയോ?

അഹംബോധത്തിന്‍റെ സുര്യരേതസ്സോ?

അരുമയായ് പുലരേണ്ട യുവസ്വപ്ന-

ങ്ങളെറിഞ്ഞുടച്ചു നീ പോരിക 

അന്ധവെറിവൈകൃതങ്ങള്‍ വാതുവെച്ചാടുന്ന

സന്ധ്യകള്‍ പുലരികള്‍ നീ കാക്കുക.

പിരിയുന്നു നിന്നച്ഛനുമ്മയും

എരിയാതെരിയുന്ന തിരിയായി നീയും.