ഞാൻ തേടുന്നത് നിന്നെയാണ്

ഞാൻ തേടുന്നത് നിന്നെയാണ്

=====================

(ചിഞ്ചു അൽഫോൻസ്)

ഇളം വെയിലുള്ള ഇട വഴിയിലൂടെ

ഒരു കുടക്കീഴിൽ , നിന്റെ വിരലിൽ  വിരൽ തൊടാതെ

മെല്ലെ നടന്ന ആ നിമിഷങ്ങൾ..

ഉള്ളിലുള്ള സ്നേഹത്തെ അടക്കിവയ്ക്കാൻ

ഞാൻ പാടുപെട്ടെങ്കിലും ,

എന്റെ കണ്ണുകളെ വഞ്ചിക്കാനാവില്ലെന്ന സത്യം

ഞാൻ മറന്നു പോയോ ..?

മെല്ലെയൊഴുകുന്ന തിരമാലകളിൽ നോക്കി

നമ്മൾ സ്വകാര്യം പറഞ്ഞപ്പോൾ

അവയുടെ പാദസരങ്ങൾ,

ഒരു കൊഞ്ചലോടെ കാതിൽ പറഞ്ഞത്

ഇതു വരെ കേൾക്കാത്ത കഥകളായിരുന്നോ...?

ഒരു വാക്കുപോലും മിണ്ടാതെ ,

മൌനം അതിഥിയായി നമ്മൾ ,

കണ്ണിൽ നോക്കിയിരുന്നപ്പോൾ ,

കലുഷമായ മനസ്സിൽ പ്രണയത്തിന്റെ തിളക്കമായിരുന്നോ?

നിന്റെ നോട്ടത്തിൽ

പൂ വിടരും പോലുള്ള ചിരിയിൽ ഞാൻ കണ്ടു

പൂക്കളും നക്ഷത്രങ്ങളും നിറഞ്ഞു നിൽക്കുന്ന ഒരു മായ ലോകം .

അവിടെ ഒരു കാറ്റായി ഞാൻ പറന്നു നടന്നു ,

കൊതി തീരും വരെ ...

സമയം ക്രൂരമായ് നമ്മെ നോക്കി ചിരിച്ചപ്പോൾ ,

വേദന നിറഞ്ഞ ഒരു മൌനമേ ,

പകരം വയ്ക്കാൻ നമുക്കുണ്ടായുള്ളൂ ...

യാത്ര പറയാനാവാതെ വാക്കുകൾ മടിച്ചപ്പോൾ

ഒരു നൊമ്പരമായ്  അടർന്നു വീണ  കണ്ണുനീർത്തുള്ളികൾ,

ഹൃദയത്തിലെയ്ക്കാണോ മഴയായ് പെയ്തത് ..?

നിന്നിൽ നിന്നും പറിച്ചെടുത്ത കാലടികൾ ,

മുൻപോട്ടു നീങ്ങാനാവാതെ ,

ഒരൽപം പതറിയോ..?

ഒരിക്കൽ കൂടി തിരുഞ്ഞു നോക്കിയപ്പോൾ

നിന്റെ കണ്ണുകൾ എന്നെ തിരികെ വിളിച്ചോ...?

അരുതേയെന്ന് ഹൃദയം കരഞ്ഞപ്പോൾ ,

ഒരു ശാസനയോടെ  എന്റെ പാവം ഹൃദയത്തെ

നുള്ളി നോവിച്ചതെന്തിനു വേണ്ടി ...?

ഓർമകളെ നിറ കൂട്ടുകളാക്കി ,

മനസ്സിന്റെ ഭിത്തിയിൽ വരച്ചു തുടങ്ങിയ

ചിത്രത്തിന്റെ  നീലിമ കൂട്ടനായ്

ഇനിയും നമുക്ക് കാണാം

ശാന്തമായ ഈ കടൽത്തീരത്ത്