ഉത്തര പേപ്പർ
വൈദ്യുതി വെളിച്ചത്തെ
മാനത്തു നിന്നു വന്ന
മഴ മാലാഖ കുടിലിൽ
നിന്നും വിളിച്ചിറക്കിക്കൊണ്ടു പോയതോടെ,
മണ്ണെണ്ണ വിളക്കിൻ വെളിച്ചം
കൊണ്ടായിരുന്നു
ഗണിതത്തിൻ സമവാക്യങ്ങളെ
തലയിൽ ഉറപ്പിച്ച് വെച്ചത്
ഇടക്കിടെ അടിച്ചു വീശുന്ന
കാറ്റ് വെളിച്ചത്തെ
ഊതിക്കെടുത്തുന്നുണ്ടെങ്കിലും,
ക്ഷമയോടെ വീണ്ടും വെളിച്ചം കത്തിച്ചിരുന്നു
തീപ്പെട്ടിക്കൊള്ളി തീർന്നതോടെ,
ചകിതനായി പുതപ്പിനുള്ളിൽ
ഉറക്കമില്ലാതെയാണ്
നേരം വെളുപ്പിച്ചത്
ക്ലാസ് മുറിയിൽ നിന്നും ഉത്തര പേപ്പർ ഇരുകരങ്ങളിൽ
കിട്ടിയതോടെ,
തലയിൽ തിരുകിവെച്ച
സമവാക്യങ്ങളെ പരത്തിയെഴുതിയാണ് പേജ് നിറച്ചത്
എളുപ്പമാണെന്ന് തോന്നിയതോടെ,
ജീവിതത്തിൻ്റെ ഒരു പടി
ചവിട്ടിക്കയറിയത് പോലെയായിരുന്നു
പിന്നീടുള്ള ദിനങ്ങൾ
ഫല പ്രഖ്യാപനം
കൊതിച്ച്
കലണ്ടറിൻ അക്കങ്ങളെ
എണ്ണിത്തീർത്തിരുന്നു
ഞൊടിയിടയിൽ
പത്രത്തിൻ താളുകളിൽ
ഉത്തര പേപ്പർ നഷ്ടപ്പെട്ടുവെന്ന്
കണ്ടതോടെ,
ലക്ഷ്യവുമായി ചിറകടിച്ചുയരുന്ന
പക്ഷി വൈദ്യുതി ലൈനിൽ
തട്ടി താഴെ വീണതു പോൽ,
എൻ മണ്ണെണ്ണ വിളക്കിൻ
കഷ്ടത തൻ ശതമാനവും
വെളളത്തിൽ എഴുതിയത്
പോലെയായി
*ശാഫി വേളം*
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ