🌹റോസാപ്പൂവ്🌹
രചന: ഇസ്ഹാഖ് നരിപ്പറ്റ
➖➖➖➖➖➖
ഓരോ രാത്രിയും പ്രണയത്തെ
ഗർഭം ധരിക്കുന്നു
നിഴൽ വറ്റിയ രൂപങ്ങൾക്ക്
നിലാവ് കളമൊരുക്കുന്നു.
ഉടലിറക്കങ്ങളുടെ ഭൂമിയിലെ
വേനൽ തുഷാരമാം നിന്നെ
അനന്തതയുടെ വിഹായസ്സി-
ലേക്ക് പറത്തുന്നു.
കടൽ,ആകാശം,പ്രണയം,
അറ്റമില്ലാത്ത നഗ്നചിത്രങ്ങളി
ലേക്കു മാത്രം ഉന്നം
പിടിക്കും വേട്ടക്കാരൻ
നിന്നോളം വലിപ്പമുള്ള
ഒരാകാശവും പറന്നിട്ടില്ല.
നിന്നോളം ആഴമുള്ള
ഒരു കടലും നീന്തിയിട്ടില്ല.
ഈ വാക്കുകൾ നടപ്പാതകളിൽ
പ്രതിധ്വനിച്ചു മരണമടഞ്ഞു.
ഒറ്റപ്പെട്ടൊരു വീട്ടിൽ
അവയെ മറവ് ചെയ്തു.
പരിഭ്രമപ്പാച്ചലുകളില്ലാതെ
ചന്ദ്രൻ സുര്യനു വഴിമാറി.
സന്ധ്യ പക്ഷിയോടൊപ്പം
പുലർവെട്ടമൊഴിഞ്ഞുപോയി.
നിന്റെ ഇല്ലായ്മകളുടെ
പകലുകൾ വൈകി ജനിക്കുന്നു.
രാത്രികൾ മാതൃദു:ഖത്താൽ
നരകിച്ചു മരിക്കുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ